Category 科技

已經被大多數遺忘咗嘅ICQ，今次終於要收皮喇。喂，你重記唔記得自己個ICQ UIN（如果你有的話）？如果冇記錯，我個UIN應該係1613xxx，不過唔知個password重係唔係有效。 睇咗啲報道，話今次ICQ關閉係代表一個時代嘅終結云云。其實講真，如果話係時代嘅終結，咁呢個時代應該已經終結咗20年。 當年微軟都係用佢嘅套路啦，內置MSN Messenger喺Windows，加埋AOL收購咗ICQ之後加咗啲新功能同埋加插廣告banner令程式又慢又臃腫，返工要扮工，用內置嘅程式緊係方便啲，啲人慢慢轉咗去MSN。至於之後ICQ再賣咗畀俄仔，MSN都收埋檔，連AOL都轉咗幾次手又係其他故事喇。 早幾年前俄仔推ICQ手機app，好似曾經吸引咗咗一批舊用戶download同埋嘗試login返個封咗塵嘅account，呢股懷舊熱維持咗幾日！之後，就冇之後喇。 其實喺呢個年代，因為資訊流通，一件產品或者一個app可以爆紅得好快，但係因為通訊軟件個用戶群好廣，又唔同講法。例如有一個通訊軟件新出咗，我覺得好好用喎，於是我唔只自己裝咗，我重介紹埋畀身邊嘅人安裝。但只要其中有部份人唔肯轉用，其實最終都係冇乜人會用，或者變成小眾工具（例如Signal）。呢個應該係所謂嘅networking effect。畢竟，用與唔用，唔係只係因為功能/效能，有時要睇埋嗰個地區嘅norm，有時重要睇埋國家力量/手段咁囉。 見到有人評論，話懷念ICQ嗰個年代，嗰個年代人好似單純啲。係呀，真㗎，諗吓而家每日收到幾多電騙電話、短信、WhatsApp、微信女，呃你錢、嘥你時間。喺以前個年代，最多都係行行吓街，有條友話自己係星探氹你上去佢office然後呃你錢，又或者買電器入咗間黑店落閘唔畀你走(呢樣都幾恐怖)。科技進步嘅其中一個結果，就係令個人嘅生活變得複雜吖嘛。